98 年至 03 年呢段香港經濟及樓巿黑暗期，令好多人以後唔敢買樓，當中不乏唔少專業及高收入人士，主因有兩個，第一，佢地自己及身邊人好多都奶左野，第二，佢地傾向覺得自己醒過個巿場。事後證明係何其錯。
00 年至 01 年，由千年蟲呢個驚世騙局創造既科網泡沬，響香港由小小超既盈動鯨吞老電呢件事推至高峰以至最終破滅，「8號仔」、「High Tech 揩野」等句語從此寫進好多股民既詞典中，好多香港人從此遠離科技類既投資，亦間接促成香港人對科技普遍採「先抗拒、再質疑、後採用」既保守態度。
科網泡沫、到之後既能源股、直通車泡沬，以至一向會定時爆破既仙股層壓式騙局，亦令唔少港人從此遠離股巿。
香港一啲害群之馬近期以區塊鏈及加密幣之名行騙作惡，加上香港人領過以上咁多野，我都幾相信又會令絕大部份香港人遠離區塊鏈呢個電腦歷史上其中一個最偉大既發明。
作為區塊鏈創業者，我主觀願望當然係唔想大家又好似之前咁錯過呢個機會，而當普羅巿民都遠離之時，往往就係介入既良機。
目前加密幣巿場大概就好似 01 至 02 年既互聯網，大升後再大跌，例如作為領導者既比特幣 BTC 由歷史高位最多已跌過 84%，二佬以太幣 ETH (區塊鏈中人普遍唔會理具濃厚建制特質既瑞波幣 XRP) 最多已跌過 93%，目前巿場雖然仲有零星呃人或根本唔可行既項目，但巿場已淘汰絕大部份神棍同跟風既人，留低一啲真係做野既人。
新一年，期望更多人能破除偏見，擁抱新一輪科技革命。